नांदेड :- नांदेड जिल्ह्यामध्ये आचारसंहिता लागल्यापासून आजपर्यंत २४ लाख रुपयांचा ऐवज जप्त करण्यात आला आहे. प्रशासनाने जिल्ह्यातील नऊ विधानसभा व नांदेड लोकसभा पोटनिवडणुकीच्या कालावधीत आणखी सक्त कारवाई करण्याचे निर्देश दिले आहेत.
नांदेड लोकसभा पोटनिवडणूक व विधानसभा सार्वत्रिक निवडणुकीत मतदान २० नोव्हेंबर रोजी होणार आहे. या निवडणूक कालावधीत जिल्ह्यात कायदा व सुव्यवस्था राखण्यासाठी जिल्हा प्रशासनाच्यावतीने फिरते पथक व स्थिर निगराणी पथक तैनात केली आहेत. या पथकामार्फत काळात पैशाची देवाण-घेवाण, भेट वस्तु वाटप, रोख रक्कम, अंमली पदार्थ, दारु विक्री व वाहतूक अशा घटनांवर करडी नजर ठेवण्यात येत आहे. या पथकामार्फत धडक कारवाई करण्यात येवून एकूण २४ लाख ४ हजार ९१५ रुपयांचा मुद्देमाल जप्त करण्यात आला आहे.
यात भोकर १ लाख ७० हजार ३० रुपये, देगलूर २ लाख ७७ हजार ६५०, हदगाव २६ हजार ९००, किनवट १ लाख ७१ हजार ७२५, लोहा ४४ हजार १००, मुखेड ७१ हजार १४०, नायगाव ३ लाख १० हजार ९८०, नांदेड उत्तर १२ लाख ३५ हजार ३८०, नांदेड दक्षिण ९७ हजार १० रुपयांचा मुद्देमाल जप्त करण्यात आला आहे.
