प्रतापराव पाटील चिखलीकर यांचा अखेर भाजपाला जय श्रीराम..! नांदेडच्या राजकारणाला पुन्हा एकदा मिळाली कलाटणी 

माजी मुख्यमंत्री अशोकराव चव्हाण यांनी एप्रिल २०२४ मध्ये झालेल्या लोकसभा निवडणुकीच्या तोंडावर भारतीय जनता पक्षात प्रवेश केल्यानंतर नांदेडच्या भाजपाला मोठे बळ मिळेल, असा विश्वास देशपातळीपासून ते राज्यपातळीवरील नेत्यांना होता. जिल्हा पातळीवरही चिखलीकर आणि अशोकराव मिळून लोकसभेच्या निवडणुकीत विजयाचा इतिहास रचतील असा विश्वास जिल्ह्यातील भाजप प्रेमींना वाटू लागला. पण लोकसभेचा निकाल अनपेक्षितपणे भाजपाच्या विरोधात गेला. निवडणुकीच्या मध्यात अन् निकालानंतरही भाजपाचे उमेदवार प्रतापराव चिखलीकर यांच्या पाठीत कोण कोण खंजीर खुपसला याच्या चर्चा सुरू झाल्या होत्या. त्या चर्चांनाही खुद्द चिखलीकर यांनी निकालानंतर आपल्याला मिळालेल्या समर्थनार्थ लोकसभा मतदारसंघातील आभार बैठकात चिखलीकर यांनी सभेत तोफ डागताना प्रत्येकाचा हिशेब होईल, असे वक्तव्य केले होते. त्या वक्तव्याचे वेगवेगळे अर्थ काढले गेले. पुढे चिखलीकर यांनाच खुलासा करावा लागला होता. काही काळ चिखलीकर आणि अशोकराव चव्हाण यांनी आम्ही एकत्र असल्याचा दावा केला होता. पक्षांतर्गत वेगवेगळ्या पदावर नियुक्ती देतानाही चव्हाण आणि चिखलीकर यांच्यात एकमेकांना शह काटशह सुरूच होते.

एप्रिल २०२४ च्या लोकसभा निवडणुकीत चिखलीकर यांचा पराभव का झाला, याची कारणमीमांसा करण्यासाठी राज्यस्तरावर समिती गठित झाली होती. नांदेडचे निरीक्षक म्हणून  महसूल मंत्री राधाकृष्ण विखे पाटील तसेच माजी केंद्रीय रेल्वे राज्यमंत्री रावसाहेब दानवे यांनी नांदेड येथे स्थानिक कार्यकर्त्यांशी चर्चा करून पराभवाची कारणे जाणून घेतली. यावेळी अनेक पदाधिकारी, नेते यांना चिखलीकर यांच्या पराभवास जबाबदार असल्याचे बैठकीतच कार्यकर्त्यांनी सांगितले होते. अनेक बैठकीत वादही झाले होते. मात्र पराभवास जबाबदार असणाऱ्यांविरुद्ध कोणतीही कारवाई झालीच नव्हती. विजयासाठी चांगली परिस्थिती असतानाही माजी मुख्यमंत्री अशोकराव चव्हाण यांच्या भाजप प्रवेशाने संपूर्ण चित्रच बदलले होते. निकालानंतर त्याबाबतही वेगवेगळ्या चर्चा झाल्या. या सर्व घडामोडींवर चिखलीकर आता खुलेपणाने बोलतील, ते आपल्या लोकसभेतील पराभवाचा ठपका कोणाकोणावर फोडतात हे पाहणेही आता औत्सुक्याचे ठरणार आहे.