नांदेड – नांदेडमध्ये कायदा, सुव्यवस्था सांभाळणे हे प्रमुख आव्हान आहे. त्याचवेळी गुन्हेगारावर वचक ठेवणे हेही पोलिसांचे प्रमुख उद्दिष्ट राहणार आहे. याच अनुषंगाने सर्वांना सूचना देण्यात आल्या आहेत. जनतेनेही पोलिसांसोबत रहावे, माहिती द्यावी. पोलीस आपल्या सोबत आहेत. ११२ या सेवेचाही जनतेने लाभ घ्यावा. काही माहिती असेल तर कॉल करावा. जिल्ह्यातील अवैध धंदे बंद करायचे आहेत तसेच कोणत्याही अवैध कार्यामध्ये सहभागी न होता योग्य पोलिसिंग व्हावी अशीच आपली जिल्ह्यातील पोलीस अधिकारी आणि कर्मचाऱ्यांकडून अपेक्षा असल्याचेही नूतन जिल्हा पोलीस अधीक्षक डॉ. निलाभ रोहन यांनी स्पष्ट केले.
नांदेड जिल्हा पोलीस अधीक्षक डॉ. नीलाभ रोहन यांनी नायगाव येथील एका गुन्हा संदर्भाने बुधवारी पोलीस अधीक्षक कार्यालयात पत्रकार परिषद घेतली. या गुन्ह्याच्या माहितीनंतर जिल्हा पोलीस अधीक्षकांनी जिल्ह्यातील आपल्या प्रमुख उद्दिष्टांची माहिती दिली. पोलीस पोलीस अधीक्षक डॉ. निलाभ रोहन यावेळी म्हणले, नांदेड जिल्ह्यात प्रामुख्याने कायदा आणि सुव्यवस्था सांभाळणे हेच प्रमुख आव्हान आहे. याच अनुषंगाने आपण जिल्ह्यातील पोलीस अधिकारी आणि कर्मचाऱ्यांना सूचना दिल्या आहेत. जनतेनेही पोलिसांना सहकार्य करावे, अवैध धंद्यांची माहिती असेल तर त्याबाबतही कळवावे. पोलीस आपल्यासोबत सदैव असल्याचे ते म्हणाले. जिल्ह्यातील सर्व अवैध धंदे बंद करणे याकडेही पोलिसांचे लक्ष राहणार आहे.
दुसरीकडे जिल्ह्यातील पोलीस अधिकारी आणि कर्मचाऱ्यांनीही बेसिक पोलिसिंगकडे लक्ष देऊन जिल्ह्यात कायदा व सुव्यवस्था अबाधित ठेवण्यासाठी प्रयत्न करण्याच्या सूचना दिल्याचे त्यांनी सांगितले. पोलीस अधिकारी आणि कर्मचाऱ्यांनी कोणत्याही अवैध कार्यामध्ये सहभागी होऊ नये, असेही त्यांनी स्पष्ट केले. उमरी ठाण्यातील दोन पोलीस कर्मचाऱ्यांना निलंबित करण्यात आल्याबाबत विचारले असता त्या कर्मचाऱ्यांचे व्हिडिओ प्राप्त झाले होते. त्या व्हिडिओची अपर पोलीस अधीक्षकांमार्फत चौकशी करण्यात आली. त्या चौकशीमध्ये तथ्य आढळून आले. त्यामुळे दोन्ही कर्मचाऱ्यांना निलंबित केल्याचे डॉ. निलाभ रोहन यांनी सांगितले.
अवैध धंद्यांच्या बाबतीत झिरो टॉलरन्स..! अवैध जिल्ह्यांच्या बाबत झिरो टॉलरन्स हेच धोरण आगामी काळात राहणार असल्याचे पोलीस अधीक्षक डॉ. निलाभ रोहन यांनी स्पष्ट केले. अवैध धंद्यांना कोणत्याही परिस्थितीत पाठिंबा देऊ नका अशा सूचना पोलीस अधिकारी, कर्मचाऱ्यांना देण्यात आल्या आहेत. जिल्ह्यातील अवैध वाळू उपसाबाबत आगामी काळात महसूल विभागाशी समन्वय साधून कारवाई केली जाईल. महसूल विभाग आणि पोलिसांनी संयुक्तपणे कारवाया केल्या पाहिजे असेच अपेक्षित आहे. पोलीस चांगले काम करत आहेत, अशीच प्रतिमा तयार केली जाईल असेही ते म्हणाले.
