नांदेड – जिल्हा प्रशासन, नांदेड महापालिका आणि गुरुद्वारा श्री सचखंड बोर्डाच्या वतीने आयोजित दिवाळी पहाटसाठी नांदेडमध्ये आलेल्या गझल नवाज भीमराव पांचाळ यांच्या प्रमुख उपस्थितीत उद्या रविवारी नांदेडमध्ये शासकीय विश्रामगृहावर ‘गझल संवाद’ हा कार्यक्रम आयोजित केला आहे. गझल लिहिताना येणाऱ्या अडचणी, गझल गाताना येणाऱ्या अडचणी तसेच गझलच्या एकूणच प्रवासाबाबत या कार्यशाळेत चर्चा केली जाणार आहे.
गझल लिहू इच्छिणाऱ्या तसेच गझल गाण्यासाठी इच्छुक असणाऱ्या लेखक आणि गायकांना स्वतः पांचाळे हे मार्गदर्शन करणार आहेत. गझलवर प्रेम करणाऱ्या तसेच गझलबाबत रुची असणाऱ्या रसिकांसाठी ही कार्यशाळा होणार आहे. ही कार्यशाळा म्हणजे आपल्या गझल प्रचार आणि प्रसाराचा भाग असल्याचे गझल नवाज भीमराव पांचाळे यांनी सांगितले. नांदेडमध्ये रविवारी सकाळी ११ वाजता शासकीय विश्रामगृहात होणाऱ्या या कार्यशाळेत सर्व गझलप्रेमींनी उपस्थित रहावे, असे आवाहन गझल नवाज भीमराव पांचाळे यांनी केले आहे.
