नांदेड पोलिसांची सलग दुसऱ्या दिवशी वाळू माफियांवर कारवाई 

जिल्ह्यात भर पावसाळ्यातही आणि गोदावरी नदीला पूर आला असतानाही बोटीच्या सहाय्याने आणि वेगवेगळ्या यंत्रसामुग्रीच्या सहाय्याने अवैध वाळू उपसा सुरूच होत वाळू माफीयांनी गोदाकाठावर जाण्यासाठी मोठ्या प्रमाणात रस्तेही तयार केले आहेत. गावात चालायला रस्ते नाहीत मात्र वाळूमाफीयांनी बाराही महिने अवैध वाळू उपसा करता यावा यासाठी नदीकाठी रस्त्यांचे मजबूत जाळे तयार केले आहे. त्यामुळे पावसाचाही कोणताही परिणाम अवैध वाळू उपसावर होत नव्हता. परिणामी या वाळू उपशातून कोट्यवधीची उलाढाल सुरूच होती. ही उलाढाल अनधिकृतपणेच असल्याने मोठ्या प्रमाणात गुन्हेगारी प्रवृत्तीचे लोक या धंद्यात उतरले आहेत. स्थानिक महसूल तसेच पोलीस अधिकारी कर्मचाऱ्यांना हाताशी धरून आणि वरिष्ठांचीही मर्जी राखून हा कारभार सुरू होता. त्याचवेळी वाळू उपसा करण्यासाठी उत्तर प्रदेश बिहार या राज्यातून मोठ्या प्रमाणात मजुरांची आयात या वाळू माफीयांनी केली आहे. त्यांना अत्यल्प मजुरी देऊन त्या मजुरांचेही शोषणही या वाळूमाफियांकडून सुरू आहे. त्यामुळे उत्तर प्रदेश, बिहारमधून येत असलेल्या या वाळू मजुरांमध्ये काही असामाजिक तत्त्वेही आपली पोळी भाजून घेत आहेत. मोठ्या प्रमाणात गावठी कट्ट्यांची तस्करी या मजुरांच्या माध्यमातून होत असल्याच्या अनेक तक्रारी पुढे आल्या आहेत. मात्र होत असलेली कोट्यवधींची आर्थिक उलाढाल यातून संबंधित विभागाचे अधिकारी, कर्मचारी याकडे कानाडोळा करत असल्याचे चित्र जिल्ह्यात सर्वत्रच आहे.