नांदेड – नांदेड पोलीस परिक्षेत्राच्या विशेष पोलीस उपमहानिरीक्षकपदी शहाजी उमाप हे आज २५ जुलै रोजी नांदेडमध्ये रुजू झाले आहेत. त्यांनी महानिरीक्षक डॉ. शशिकांत महावरकर यांच्याकडून आपला पदभार स्वीकारला आहे. डॉ. महावरकर हे पिंपरी चिंचवड येथे सहआयुक्तपदी रुजू होणार आहेत.
नांदेड पोलीस परिक्षेत्राच्या उपमहानिरीक्षकपदी बृहन्मुंबईच्या विशेष शाखेचे अपर पोलीस अधीक्षक शहाजी उमाप यांची पदोन्नतीने ९ जुलै रोजी राज्य शासनाने नियुक्ती केली होती. तर नांदेडचे विशेष पोलीस महानिरीक्षक डॉ. शशिकांत महावरकर यांची पुणे अन्वेषण विभागाचे विशेष पोलीस महानिरीक्षक म्हणून बदली करण्यात आली. या बदलीविरोधात डॉ. महावरकर यांनी केंद्रीय प्रशासकीय न्यायाधिकरणाकडे धाव घेतली होती. यावर केंद्रीय प्रशासकीय न्यायाधिकरणाच्या ११ जुलैच्या सुनावणीत शहाजी उमाप यांना नांदेडचा पदभार स्वीकारू नये असे निर्देश दिले होते. तर पुढे १९ जुलै रोजी झालेल्या सुनावणीत राज्य शासनाने डॉ. महावरकर यांना नियुक्तीसाठी राज्यातील इतर चार ठिकाणचे पर्याय उपलब्ध असल्याचे सांगितले. त्यातून महावरकर यांनी पिंपरी चिंचवडच्या सहआयुक्त पदाची जबाबदारी स्वीकारण्याची तयारी दर्शवली. त्यानुसार राज्य शासनाने त्यांची बदली पिंपरी चिंचवडच्या सहाय्यक आयुक्तपदी केली.
या बदलीचे आदेश दोन दिवसांपूर्वी प्राप्त झाले होते. या आदेशानंतर नांदेड पोलीस परिक्षेत्राच्या उपमहानिरीक्षकपदी रुजू होण्याचा शहाजी उमाप यांचा मार्ग मोकळा झाला. बदल्यच्या नव्या आदेशानंतर उमाप हे आज २५ जुलै रोजी नांदेडमध्ये दाखल झाले. त्यांनी सकाळी नांदेड पोलीस परिक्षेत्राच्या उपमहानिरीक्षक पदाचा आपला पदभार डॉ. महावरकर यांच्याकडून स्वीकारला. त्यामुळे नांदेड पोलीस परिक्षेत्राच्या नियुक्ती नाट्यावर आता पडदा पडला आहे.
नांदेड जिल्ह्यात अप्पर पोलीस अधीक्षक, पोलीस अधीक्षक म्हणूनही केले आहे काम… नांदेड पोलीस परिक्षेत्राच्या विशेष पोलीस उपमहानिरीक्षक पदी रूजू झालेल्या शहाजी उमाप यांनी नांदेडमध्ये ५ एप्रिल २००९ ते २० जून २०१२ या कालावधीत काम पाहिले आहे. प्रारंभी अप्पर पोलीस अधीक्षक म्हणून ते नांदेड येथे रुजू झाले होत. त्यानंतर त्यांना पोलीस अधीक्षक पदाचाही पदभार देण्यात आला होता. नांदेडमध्ये असताना त्यांनी एका खून प्रकरणाच्या तपासात विष्णुपुरी येथे एक घर खोदले होते. हा तपास राज्यात चांगलाच गाजला होता. त्याच वेळी एका सिरीयल किलरच्याही त्यांनी मुसक्या आवळल्या होत्या. जिल्ह्यात अवैध धंदे करणाऱ्यांवर फास आवळून कोट्यावधींची रक्कम फिर्यादीना परत करण्याचे काम त्यांनी केले होते. दुसरीकडे महात्मा गांधी तंटामुक्त राज्य अभियानात नांदेडला राज्यात पहिला क्रमांक मिळवण्याचा बहुमान त्यांनी मिळवून दिला होता. शहर वाहतुकीतील सुधारणेचा यशस्वी प्रयत्न त्यांनी केला होता. त्यांच्या बदलीनंतर शहरातील वाहतूक पुन्हा जैसे थे झाली. आता शहाजी उमाप यांनी नांदेड परिक्षेत्राचे विशेष पोलीस उपमहानिरीक्षक म्हणून पदभार स्वीकारताच पुन्हा एकदा गुन्हेगारांना धडकी भरली आहे.
रुजू होताच उमाप यांची राष्ट्रपतींच्या दौऱ्याची तयारी सुरू…नांदेड पोलीस परिक्षेत्राच्या विशेष उपमहानिरीक्षकपदी रुजू झाल्यानंतर शहाजी उमाप यांनी पहिल्याच दिवशी राष्ट्रपतींच्या उदगीर आणि नांदेड दौऱ्याच्या बंदोबस्ताची तयारी सुरू केली आहे. ३० जुलै रोजी उदगीर येथे बौद्ध विहाराच्या उद्घाटन कार्यक्रमासाठी महामहीम राष्ट्रपती द्रौपदी मुर्मू या येणार आहेत. नांदेडमार्गे त्यांचा दौरा होणार आहे. नांदेडमध्येही राष्ट्रपती मुर्मू या श्री सचखंड गुरुद्वारा येथे भेट देणार आहेत. त्यामुळे परिक्षेत्रातील दोन्ही जिल्ह्यातील बंदोबस्ताच्या तयारीचा आढावा उमाप यांनी आज गुरुवारी पहिल्याच दिवशी घेतला. लातूर आणि नांदेड जिल्हा पोलिसांकडून दौऱ्यांचा आराखडा मागितला. यासाठी आवश्यक अधिकारी, कर्मचाऱ्यांची माहिती घेतली. त्यानुसार आता लवकरच बंदोबस्ताचा प्लॅन तयार होणार आहे. त्यामुळे उमाप यांनी बृहन्मुंबई येथील विशेष शाखेच्या अप्पर पोलीस अधीक्षक पदाचा आपला पदभार सोडताना मुंबईत उपराष्ट्रपतींचा दौरा पार पाडला होता. त्याचवेळी नांदेड येथे रुजू होताच आता उमाप राष्ट्रपती द्रौपदी मुर्मू यांच्या दौऱ्याचे नियोजन करायचे आहे, हा एक योगायोगच म्हणावा लागेल.
