नांदेड – होणार..होणार.. अशा चर्चा सुरू असतानाच आता नांदेडकरांसाठी आनंदाची बातमी मिळाली आहे. मुंबई – नांदेड – मुंबई हे विमानसेवा येत्या २५ डिसेंबरपासून सुरू होत आहे. स्टार एअर कंपनीची ही विमान सेवा असणार आहे. स्टार कंपनीच्या वेबसाईटवर बुकिंगही सुरू झाली आहे. त्यामुळे आता मुंबईसाठी नांदेडकरांना थेट उड्डाण घेता येणार आहे. पण त्याचवेळी गोव्याला विमानाने जाण्यासाठी उत्सुक असलेल्या प्रवाशांना आणखी प्रतीक्षाच करावे लागणार आहे.
बहुप्रतिक्षित नांदेड – मुंबई विमानसेवेमुळे आता नांदेड, हिंगोली, परभणी, लातूर, वाशिम, हिंगोली अशा सर्व जिल्ह्यातील प्रवाशांना या विमानसेवेचा लाभ घेता येणार आहे. मुंबई – नांदेड – मुंबई विमानसेवा येत्या २५ डिसेंबरपासून सुरू होत आहे. स्टार एअर कंपनीच्या वेबसाईटवर बुकिंग सुरू झाली आहे. ही विमानसेवा नोव्हेंबरमध्येच नियोजित होती. मात्र तांत्रिक कारणांमुळे त्यास विलंब झाल्याची माहितही पुढे आली आहे.
मुंबई – नांदेड – मुंबई ही विमानसेवा मंगळवार, गुरुवार आणि शनिवारी उपलब्ध असेल. परंतु, लवकरच ही विमानसेवा दररोज सुरू होईल असेही सूत्रांकडून सांगितले जात आहे. नांदेडहून सध्या पुणे, बंगळुरू, हैदराबाद, अहमदाबाद आणि दिल्लीसाठी विमानसेवा सुरू आहे. नांदेडहून थेट दिल्ली आणि अमृतसरसाठी विमान सेवा सुरू करण्याची मागणीही मोठ्या प्रमाणात केली जात आहे. त्यात आता मुंबईत विमान सेवा सुरू झाल्याने मुंबईहून देशातील इतर ठिकाणावर जाण्यासाठी सुविधा उपलब्ध राहणार आहे. त्यामुळेही समाधान व्यक्त होत आहे. गोव्याला विमानाने जाण्यासाठी उत्सुक असलेल्या प्रवाशांना मात्र आणखी प्रतीक्षा करावी लागेल होणार आहे. अद्याप या सेवेबाबत कोणताही निर्णय झाला नाही. त्यामुळे ख्रिसमसच्या दिवशी गोव्याला जाण्याचा प्रयत्न करणारे आता प्रतीक्षेतच राहणार आहेत; पण त्यावेळी मुंबईला मात्र त्यांना उड्डाण घेता येणार आहे.
नांदेड – मुंबई विमानसेवा सुरू करण्यासाठी मुख्यमंत्री देवेंद्र फडणवीस, केंद्रीय नागरी उड्डयन मंत्री के. राममोहनजी नायडू, केंद्रीय राज्यमंत्री मुरलीधरजी मोहोळ यांचे सहकार्य लाभल्याचे सांगत माजी मुख्यमंत्री, खा. अशोकराव चव्हाण यांनी या निर्णयाचे स्वागत केले आहे.
