नांदेड – जिल्ह्यात गोदावरी, पैनगंगा, मांजरा, आसना, लेंडी, कयाधू, मन्याड या प्रमुख नद्या असून जिल्ह्यातील ३३७ गावे पूरप्रवण आहेत. नांदेड जिल्ह्यात पावसाळ्यात पूरपरिस्थिती निर्माण होऊन अनेक संकटे उद्भवतात. या पार्श्वभूमीवर नांदेडमध्ये एसडीआरएफची धुळे येथील एक तुकडी नांदेडमध्ये दाखल झाली आहे.
राज्यशासनाने ‘एनडीआरएफ’ च्या धर्तीवर राज्यात येणाऱ्या विविध आपत्तींचा सामना करण्यासाठी राज्य आपत्ती प्रतिसाद दलाची (एसडीआरएफ) ची स्थापना केलेली आहे. आगामी पूरपरिस्थितीचा धोका लक्षात घेऊन मराठवाडा क्षेत्रासाठी एसडीआरएफची धुळे येथील एक तुकडी नांदेड येथे तैनात करण्यात आलेली आहे. २८ मे रोजी सकाळी या तुकडीचे नांदेड येथे आगमन झाले आहे. दि. २८ मे ते दि. ३० सप्टेंबर या कालावधीसाठी ही तुकडी नांदेड येथे तैनात राहणार आहे.
या तुकडीमध्ये एकूण ३९ जणांचा समावेश असून त्यामध्ये पोलीस उप निरीक्षक दर्जाचे तीन अधिकारी व ३५ जवान आहेत. या तुकडीचे नेतृत्व पोलीस निरीक्षक राजुक्रिष्ण सुदाम कोल्हे हे करीत आहेत तर पोलीस उपनिरीक्षक दिलीप सडया चौरे, रोहित भीमराव पानपाटील व दिनेश मधुकर तायडे हे त्यांना सहाय्य करीत आहेत. या दलाची राहण्याची व्यवस्था जिल्हा क्रीडा संकुल, नांदेड येथे करण्यात आलेली आहे. सदर तुकडी ही जिल्हाधिकारी राहुल कर्डिले व निवासी उपजिल्हाधिकारी महेश वडदकर यांच्या मार्गदर्शनाखाली काम करीत असून समन्वय अधिकारी म्हणून जिल्हा आपत्ती व्यवस्थापन अधिकारी किशोर कुऱ्हे हे काम पाहत आहेत. ९४२२८७५८०८ हा त्यांचा मोबाईल क्रमांक आहे.
या एसडीआरएफ टीमने आज गुरुवारी जिल्हाधिकारी व निवासी उपजिल्हाधिकारी यांची भेट घेऊन मराठवाडा विभागातील पूरप्रवण भागाची माहिती घेतली. कोणतीही आपत्ती उद्भवल्यास पिडीत व्यक्तीला पहिल्या एका तासात (गोल्डन अवर) मध्ये मदत मिळाली तर पिडीताचे प्राण आपण वाचवू शकतो. त्यामुळे विभागात कोणतीही आपत्ती उद्भवल्यास योग्य समन्वय साधून कमीत कमी वेळात घटनास्थळी जाऊन मदतकार्य करण्याच्या सूचना जिल्हाधिकारी कर्डिले यांनी यावेळी या टीमला दिल्या.
