नांदेड महापालिकेचे कर्मचारी गुरुवारपासून संपावर 

महाराष्ट्र राज्य कास्ट्राईब कर्मचारी कल्याण महासंघातर्फे कर्मचाऱ्यांच्या विविध मागण्यांसंदर्भाने आंदोलन सुरू केले आहे. महापालिका आयुक्त आणि अतिरिक्त आयुक्त हे निवडणूक कामासंदर्भाने मुंबईत होते. महानगरपालिकेतील कार्यरत कर्मचारी आणि सेवानिवृत्त कर्मचाऱ्यांना १०.. २०.. ३० प्रमाणे आश्वासित प्रगती योजना लागू करून त्यांची थकीत रक्कम त्वरित द्यावी, कर्मचाऱ्यांना नियमित पदोन्नती द्यावी, सेवानिवृत्त कर्मचाऱ्यांना थकीत रकमा त्वरित देण्यात याव्यात, मनपाच्या कार्यरत आणि सेवानिवृत्त कर्मचाऱ्यांना घरांचे त्वरित वाटप करण्यात यावे, सातव्या वेतन आयोगाच्या फरकाची रक्कम ९६ हप्त्यात अदा न करता किमान एका वर्षाच्या कालावधीत समान हप्त्यात अदायी करण्यात यावी, कार्यरत कर्मचारी व सेवानिवृत्त कर्मचाऱ्यांच्या महागाई भत्त्याची थकीत रक्कम त्वरित देण्यात यावी, मृत पावलेल्या कर्मचाऱ्यांच्या वारसांना अनुकंपा तत्त्वावर तात्काळ सेवेत नियुक्ती द्यावी आदी मागण्या संघटनेच्या वतीने महानगराध्यक्ष साहेबराव ढगे, कार्याध्यक्ष सुमेध बनसोडे, मेघराज जोंधळे, विशाल गायकवाड, विलास पांचाळ, आनंदा खानसोळे आदींनी केल्या होत्या.

कास्ट्राईब कर्मचारी संघटनेच्या या विविध मागण्यासाठी मंगळवारी प्रशासकीय अधिकाऱ्यांनी चर्चा केली; मात्र त्यावर तोडगा निघाला नाही. त्यामुळे बुधवारी कास्ट्राईब कर्मचारी संघटनेच्या वतीने महापालिकेपुढे द्वारसभा घेऊन आपल्या मागण्या पुन्हा एकदा प्रशासनापुढे ठेवल्या;  तरीही कोणतेही ठोस आश्वासन अथवा कृती न झाल्याने गुरुवारपासून कास्ट्राईब कर्मचारी संघटनेच्या वतीने संप पुकारला आहे. बुधवारी झालेल्या आंदोलनात चांगला प्रतिसाद मिळाला सर्व विभागाचे कर्मचारी या आंदोलनात मोठ्या संख्येने सहभागी झाले होते. गुरुवारपासून होणाऱ्या संपात महापालिकेअंतर्गत अत्यावश्यक सेवा वगळता इतर सर्व विभागाचे कर्मचारी सहभागी होतील, असे संघटनेचे महानगराध्यक्ष साहेबराव ढगे यांनी स्पष्ट केले आहे.