अनधिकृत बॅनरप्रकरणी नांदेडमध्ये दोन गुन्हे दाखल

नांदेड : नांदेड शहरातील मध्यवर्ती बाजारपेठ असलेल्या शिवाजीनगर भागात महानगरपालिकेतर्फे अनधिकृत जाहिरात होर्डींग्सवर धडक कारवाई करुन बजाजनगर येथे खाजगी बिल्डर धवन रेसीडन्सीचे बॅनर लावणारे अनिल दिलीप यादव,  कंत्राटदार गणेश कटकम व विशाल माठी यांच्यासह बॅनर तयार करणारे व लावणाऱ्या अज्ञात व्यक्तीविरुध्द गुन्हा दाखल करण्यात आला आहे. भाग्यनगर आणि नांदेड ग्रामीण पोलीस ठाण्यात दोन वेगवेगळे गुन्हे दाखल करण्यात आले आहेत.

नांदेड वाघाळा शहर महानगरपालिकेने मनपा हद्दीमध्ये जाहिरात फलक लावण्यासाठी एकूण ११८ ठिकाणे निश्चित केले आहेत. सदरील ठिकाणी जाहिरात फलकांच्या फ्रेम लावण्यात आल्या आहेत. त्या फ्रेमची साईजसुध्दा निश्चित करण्यात आली आहे. ज्यामध्ये महानगरपालिकेने निर्धारीत केलेले शुल्क भरुन नागरिकांना, स्वंयसेवी संस्थांना तात्पुरती जाहिरात लावता येते. परंतु शहरातील खाजगी बिल्डर यांच्यासह बॅनर तयार करणारे व लावणाऱ्या अज्ञात व्यक्तीविरुध्द विनापरवानगी जाहिरात फलक लावण्यात आल्याचे १९ मे रोजी निदर्शनास आल्याने महाराष्ट्र विरुपन प्रतिबंधक कायदा १९९५ चे कलम ३ चे उल्लंघन केल्यामुळे संबंधीत बिल्डर व इतर व्यक्ती विरुध्द भाग्यनगर पोलीस स्टेशन येथे महानगरपालिकेतर्फे गुन्हा दाखल करण्यात आला आहे. तसेच कौठा भागात मुख्य रस्त्यालगत अनधिकृत बॅनर लावल्याप्रकारणी सिडको ग्रामीण पोलीस ठाण्यामध्येही गुन्हा दाखल करण्यात आला आहे हा गुन्हा अनोळखी व्यक्तीविरुद्ध करण्यात आला आहे.