नांदेडमध्ये भाजपने केली ‘वंचित’च्या फारुख अहमद यांची उमेदवारी रद्द करण्याची मागणी

प्रक्षोभक वक्तव्य करणाऱ्या नांदेड दक्षिण विधानसभा मतदारसंघातील वंचित बहुजन आघाडीचे उमेदवार फारूख अहमद यांच्यावर तात्काळ कठोर कारवाई करावी, अशी मागणी जिल्हाधिकारी तथा जिल्हा निवडणूक निर्णय अधिकाऱ्यांकडे आज मंगळवारी करण्यात आली आहे. फारूख अहमद यांनी प्रचारसभेत प्रक्षोभक विधान करून राजकीय आणि सामाजिक वातावरण दूषित करण्याचा प्रयत्न केल्याचा आरोप केला आहे. कुठलेही औचित्य नसताना विधानसभा प्रचार मोहिमेत नांदेड दक्षिण विधानसभेतील उमेदवार फारूख अहमद यांनी टिपू सुलतान यांच्या पुतळा उभारणीबाबत विधान केले. समाजामध्ये संभ्रम निर्माण करण्याकरता देशाचे पंतप्रधान नरेंद्र मोदी, गृहमंत्री अमित शहा तसेच अन्य नेते यांचे नाव घेऊन धमकीवजा भाषेचा प्रयोग केला. हिम्मत असेल तर कारवाई करा, मी पुतळा बसवणारच असे देशाच्या सरकारला आणि गृहमंत्र्यांना आव्हान केले. पुतळा बसल्यावर माझ्यावर काय कारवाई करायची ते करा… मेरा कुछ उखाड नही सकता असे आव्हान केल्याचे निवेदनात म्हटले आहे. भारतीय घटनेनुसार दोन धर्मात तेढ निर्माण करणे, धार्मिक आधारावर मताचे ध्रुवीकरण करणे,  विधान करून समाजात तेढ निर्माण करणे या संदर्भात केंद्रीय निवडणूक आयोग आणि राज्य निवडणूक आयोगानुसार जे कायदे लावून गुन्हा दाखल करता येतो तो करावा, फारुख अहमद यांची निवडणूक रद्द करावी, त्यांना उद्याच्या निवडणुकीत सहभाग घेता येऊ नये, त्याचवेळी अशा प्रकारच्या धार्मिक चितावणीखोर वक्तव्यामुळे यापूर्वी महाराष्ट्रात अनेक निवडणुका रद्द झाल्या आहेत, तेव्हा नांदेड दक्षिणची निवडणूकही रद्द करावी अशी मागणी केली आहे. भाजपने खा. डॉ. अजित गोपछडे यांच्या नेतृत्वाखाली बाळू खोमणे, दीपक रावत, दिलीप ठाकूर, माधव उच्चेकर, डॉ. सचिन उमरेकर, विनय सगर यांच्या उपस्थितीत हे निवेदन जिल्हाधिकारी आणि पोलीस अधीक्षक यांना दिले आहे.

नांदेड दक्षिण विधानसभा मतदारसंघात महायुतीचे उमेदवार म्हणून शिवसेनेचे आनंद बोंढारकर रिंगणात आहेत. असे असताना आज मंगळवारी निवेदन देताना शिवसेनेचा एकही पदाधिकारी, कार्यकर्ता उपस्थित नव्हता, हेही विशेष.