नांदेडमध्ये शेती, सिंचन, आरोग्य, पर्यावरणावर काम करणार – जिल्हाधिकारी राहुल कर्डिले 

जिल्ह्यात सिंचनाचे प्रमाण असले तरी ते प्रमाण आणखी वाढविण्यासाठी काम केले जाणार आहे. शेतीमध्ये काम करण्यासही मोठा वाव आहे. जिल्ह्यात सोयाबीनचे क्षेत्र मोठ्या प्रमाणात आहे. केळी, ऊस यासह फळपीकांचेही मोठ्या प्रमाणात आहे. शेती उत्पादन वाढविण्यासाठी नव्या तंत्रज्ञानाचा वापर शेतकऱ्यांना करता यावा या शासन स्तरावर प्रयत्न केले जाणार आहेत. सिंचन क्षेत्रातही काम करण्याची गरज आहे. जलसंधारणाची कामे हाती घेऊन भूजल पातळी वाढवणे गरजेचे आहे. पर्यावरण रक्षणासाठी काम करण्याची गरज आहे. वर्धा येथे जिल्हाधिकारी म्हणून कार्यरत असताना ‘चला नदीकडे जाऊ या ‘ हा उपक्रम राबविला. त्याला चांगला प्रतिसाद मिळाला आहे. याच धरतीवर नांदेड जिल्ह्यातही नदी संवर्धनासाठी काम करण्याची गरज आहे.

जिल्ह्यात सामान्य माणसांची कामे वेळेत व्हावीत या बाबीला आपले प्राधान्य राहणार आहे. शेवटच्या व्यक्तीपर्यंत शासनाच्या योजना पोहोचाव्यात यासाठी प्रयत्न केले जाणार आहेत. नागरिकांसाठी आपण सदैव उपलब्ध राहणार आहे. काही कारणामुळे भेट होत नसेल तर आपण आपला व्हॉट्स ॲप क्रमांक उपलब्ध करून देण्यात येईल. शासकीय योजनांचे अनेक प्रस्ताव बँकाकडून नाकारले जातात. परिणामी विविध शासकीय योजनांच्या अंमलबजावणीवर मोठा परिणाम होत आहे. ही परिस्थिती पूर्णतः बदलण्याचा प्रयत्न केला जाणार आहे. जिल्ह्यात सामाजिक संस्थांसोबत प्रशासन हातात हात घेऊन प्रश्न सोडविण्यासाठी पुढाकार घेणार आहे. अशा सामाजिक संस्थांशी समन्वय साधून जाणार असल्याचेही जिल्हाधिकारी कर्डिले यांनी सांगितले.