नांदेड :- लोकसभा निवडणुकीत नांदेड जिल्ह्यात मतदानाची टक्केवारी वाढविण्यासाठी प्रशासनाकडून विविध उपक्रम हाती घेण्यात आले आहेत. नांदेड महापालिकेत सोमवारी झालेल्या विविध वैद्यकीय संघटनांच्या बैठकीत लोकसभा निवडणुकीत मतदान करणाऱ्या मतदारांना उपचारात सूट देण्यात येईल, असे पत्र महापालिका आयुक्त तथा स्वीपच्या शहरी विभागाचे प्रमुख डॉ. महेशकुमार डोईफोडे यांना देण्यात आले.
स्वीप कक्षाअंतर्गत १५ एप्रिल रोजी महापालिकेत इंडियन मेडीकल असोसिएशन, इंडियन डेंटीस्ट असोसिएशन व नॅशनल इंटिग्रेटेड मेडीकल असोसिएशनच्या पदाधिकारी यांच्यासवेत मनपा आयुक्त तथा प्रशासक डॉ. डोईफोडे यांची बैठक झाली. याप्रसंगी उपआयुक्त स.अजितपालसिंघ संधू, वैद्यकीय आरोग्य अधिकारी डॉ. सुरेशसिंह बिसेन, डॉ.बदीयोद्यीन, डॉ.हनुमंत रिठे आदींची प्रमुख उपस्थिती होती.
याप्रसंगी उपस्थित वैद्यकीय संघटनांकडून नागरिकांना मतदानासाठी प्रोत्साहीत करण्याच्या हेतुने नांदेड जिल्ह्यातील इमाच्या नोंदणीकृत ३८५ खाजगी रुग्णालयात २६ व २७ एप्रिल या दोन दिवसांसाठी ज्या नागरिकांच्या बोटाला मतदान केल्याची शाई असेल त्यांना सर्व खाजगी रुग्णालयातील बाह्यरुग्ण तपासणीच्या शुल्कामध्ये ३० टक्के सवलत देण्याचे समर्थनपत्र इंडियन मेडीकल असोसिएशनचे अध्यक्ष डॉ. प्रल्हाद कोटकर यांनी मनपा आयुक्तांना दिले.
तसेच इंडियन डेंटिस्ट असोसिएशन तर्फे मतदान केलेल्या नागरिकांच्या दातांची तपासणी नि:शुल्क करणार असल्याचे पत्र असोशिएशनचे अध्यक्ष डॉ.मनिष दागडीया यांनी आयुक्तांना दिले. निमातर्फेसुध्दा मतदान केलेल्या नागरिकांसाठी २६ व २७ एप्रिल या दोन दिवसांसाठी बाह्यरुग्ण तपासणीच्या शुल्कामध्ये ३० टक्के सवलत देण्याचे समर्थनपत्र नॅशनल इंटिग्रेटेड मेडीकल असोसिएशनचे जिल्हा सचिव डॉ.संजय देलमाडे यांनी आयुक्तांना दिले आहे. याप्रसंगी शहरी भागातील स्वीप कक्षातील कर्मचारी प्रलोभ कुलकर्णी व साईनाथ चिद्रावार यांनी उपस्थितांचे आभार मानले.
या उपक्रमासाठी जिल्हाधिकारी तथा जिल्हा निवडणूक अधिकारी अभिजीत राऊत यांनी डॉक्टर आसोसिएशनच्या सहकार्याबाबत आभार व्यक्त केले आहेत.
