नांदेड – नांदेड न्यायालयाने शहरातील छत्रपती शिवाजी महाराज पुतळा ते डॉ. बाबासाहेब आंबेडकर पुतळा या रस्त्याच्या अवस्थेबाबत नांदेड महापालिकेसह सार्वजनिक बांधकाम विभागालाही विचारणा केल्यानंतर नांदेड शहरातील रस्त्यांचा रस्त्यांच्या दुरवस्थेचा प्रश्न ऐरणीवर आला आहे. आता आपल्या अखत्यारीतील रस्ते पावसाने विश्रांती देताच दुरुस्त अशी ग्वाही महापालिका आयुक्त डॉ. महेशकुमार डोईफोडे यांनी दिली आहे. दुसरीकडे आता देशाच्या महामहीम राष्ट्रपती द्रौपदी मूर्मु या ३० जुलै रोजी नांदेड दौऱ्यावर आहेत. त्यांच्या दौऱ्यानिमित्त नांदेड शहरातील रस्त्यांची दुरुस्ती करण्यासाठी आता प्रशासकीय यंत्रणांची धावपळ उडाली आहे.
शहरातील डॉ. बाबासाहेब आंबेडकर पुतळा ते छत्रपती शिवाजी महाराज पुतळा या रस्त्याच्या दुरवस्थेबाबत नांदेड न्यायालयाने नांदेड महापालिकेसह सार्वजनिक बांधकाम विभागालाही विचारणा करणारे पत्र लिहिले आहे. त्यानंतर या विषयाला आता तोंड फुटले आहे. अखेर महापालिकेने आपल्या अखत्यारीतील रस्ते दुरुस्त करण्याचा निर्णय घेतला आहे. याबाबत महापालिका आयुक्त डॉ. डोईफोडे यांनी माहिती दिली. असे असले तरीही सार्वजनिक बांधकाम विभागाकडे हस्तांतरित करण्यात आलेल्या २३ रस्त्यांच्या दुरावस्थेचे काय हाच प्रश्न नांदेडकरांना सतावत आहे. यावर सार्वजनिक बांधकाम विभागाच्या अधिकाऱ्यांकडून कोणतीही माहिती दिली जात नाही. त्यामुळे नांदेड शहरातील रस्त्यांच्या दुरावस्थेबाबत सार्वजनिक बांधकाम विभागाच्या भूमिकेबाबत प्रश्नचिन्ह निर्माण होत आहे.
नांदेड शहरातील रस्त्यांच्या दुरवस्थेबाबत आयुक्त डॉ. महेशकुमार डोईफोडे यांच्याशी चर्चा केली असता ते म्हणाले, पावसामुळे शहरातील रस्त्यांची दुरवस्था झाली आहे, ही बाब निश्चितच मान्य करता येईल. महापालिकेच्या अखत्यारीतील सर्व रस्त्यावरील खड्डे बुजवण्यास लवकर प्रारंभ करण्यात येणार आहे. पावसाने उघडीप देताच दुरुस्तीचे हे काम सुरू करण्यात येईल, असेही आयुक्त डोईफोडे यांनी स्पष्ट केले.
सार्वजनिक बांधकाम विभागाशी समन्वय ठेवू …नांदेड शहरातील अर्धवट रस्त्यांसंदर्भात सार्वजनिक बांधकाम विभागाशीही महापालिका समन्वय राखत आहे. शहरातील रस्त्यांच्या अवस्थेबाबत नागरिकांत मोठ्या प्रमाणात ओरड होत आहे. ही ओरड महापालिकेच्या नावे केली जात आहे. मात्र प्रत्यक्षात शहरातील बहुतांश प्रमुख रस्त्यांची कामे सार्वजनिक बांधकाम विभागाला हस्तांतरित केल्याने दुरुस्ती करणेही अवघड झाले आहे. त्यामुळे आता सार्वजनिक बांधकाम विभागाशी या रस्त्यांसंदर्भात समन्वय साधून रस्ते सुयोग्य करण्यासाठी प्रयत्न सुरू असल्याचे आयुक्त डोईफोडे यांनी स्पष्ट केले.
राष्ट्रपतींच्या नांदेड दौऱ्यापर्यंत रस्त्यांची अवस्था सुधारण्यासाठी होणार धावपळ…महामहीम राष्ट्रपती द्रौपदी मुर्मू या ३० जुलै रोजी नांदेड दौऱ्यावर येत आहेत. लातूर जिल्ह्यातील उदगीर येथे त्यांचा मुख्य कार्यक्रम असला तरी परतीच्या प्रवासात त्या नांदेड येथील प्रसिद्ध श्री सचखंड गुरुद्वारास भेट देऊन दर्शन घेणार आहेत. त्यामुळे नांदेड विमानतळ ते श्री सचखंड गुरुद्वारा या दरम्यानचा ये- जा करण्याचा प्रवास हा मोटारीने होणार आहे. त्यामुळे या रस्त्यावरील खड्ड्यांची दुरुस्ती निश्चितपणे होईलच, परंतु या प्रमुख रस्त्यालगतच्या रस्त्यांची अवस्थाही काही अंशी तरी सुधारावी लागणार आहे. त्यामुळे आता या दौऱ्यानिमित्त नांदेड महापालिका आणि सार्वजनिक बांधकाम विभागाच्या संयुक्त बैठकांना प्रारंभ झाला आहे या संयुक्त बैठकातून नांदेड शहरातील रस्त्यावर काही प्रमाणात तरी मलमपट्टी होणार आहे शहरवासीयांसाठी हीच बाब समाधानकारक म्हणावी लागेल.
