नांदेड जिल्ह्यात बारावी परीक्षेत १२ कॉपी बहाद्दर पकडले..! कॉपी बहाद्दरांची संख्या पोहोचली सोळावर

नांदेड – उच्च माध्यमिक प्रमाणपत्र परीक्षा अर्थात बारावी परीक्षेत गुरुवारी केमिस्ट्री विषयाचा पेपर होता या पेपरमध्ये कंधार तालुक्यातील बोरीखु येथे श्री बालाजी उच्च माध्यमिक विद्यालय या परीक्षा केंद्रावर कॉपी करणाऱ्या १२ परीक्षार्थींना पकडण्यात आले. या केंद्रावर २८६ परीक्षार्थी होते.  त्यातील पाच परीक्षार्थी अनुपस्थित राहिले. २८१ परीक्षार्थींनी येथे परीक्षा दिली. उपशिक्षणाधिकारी शेटकार यांच्या पथकाने ही कारवाई केली आहे बारावी परीक्षेत आतापर्यंत जिल्ह्यात एकूण १६ कॉपी केस आढळल्या आहेत.

आजपासून दहावी परीक्षांना प्रारंभ…जिल्ह्यात माध्यमिक शालांत प्रमाणपत्र परीक्षा अर्थात दहावी परीक्षांना २१ फेब्रुवारीपासून प्रारंभ होत आहे. दहावी परीक्षेसाठी जिल्ह्यात १७२ परीक्षा केंद्र स्थापन करण्यात आले असून या केंद्रावर ४७ हजार ९३४ विद्यार्थी परीक्षा देणार आहेत. दहावी परीक्षेत एकूण ३२ केंद्र हे  संवेदनशील घोषित करण्यात आली आहेत. परीक्षेतील गैरप्रकार रोखण्यासाठी दहा विशेष भरारी पथक स्थापन करण्यात आली आहेत. तर तालुकास्तरावर दोन भरारी पथक कार्यरत राहतील. जिल्ह्यात असलेल्या ३२ संवेदनशील केंद्रावर भेटी देण्यासाठी सात विशेष पथकही नियुक्त करण्यात आले आहेत. परीक्षेसाठी १७२ बैठे पथकही राहणार आहेत.