इतवारा ठाण्यातील ‘ते’ दोन्ही पोलीस कर्मचारी नियंत्रण कक्षात..!

नांदेड – नांदेडमध्ये सक्षम ताटे या तरुणाचा प्रेम प्रकरणातून जातीय द्वेष मनात ठेवत २७ नोव्हेंबर रोजी निर्घृण खून करण्यात आला. या प्रकरणात सक्षम ताटे कुटुंबीयांनी इतवारा ठाण्यातील त्या दोन कर्मचाऱ्याविरुद्ध कारवाई करण्याची मागणी केली. त्यांनी आंचल मामीलवाडच्या भावाला प्रेरित केल्यामुळेच हा खून घडल्याचा आरोप करण्यात आला आहे. या प्रकरणातील ते दोन्ही पोलीस कर्मचारी नियंत्रण कक्षात पाठविण्यात आले आहेत. त्यांची चौकशी सुरू असल्याची माहिती जिल्हा पोलीस अधीक्षक अबिनाश कुमार यांनी दिली.

जुन्या नांदेडातील पैलवान टी हाऊसजवळ सक्षम ताटे या युवकाचा प्रेम प्रकरणातून जातीय द्वेष मनात ठेवत मामीलवाड कुटुंबीय आणि इतर काहीजणांनी गोळ्या झाडून तसेच डोक्यात फरशीचे घाव घालून निर्घृण खून केला होता. या प्रकरणात पोलिसांनी त्यांना अटक केली आहे. पण त्याचवेळी सक्षमची प्रेयसी आंचलने केलेल्या आरोपानुसार इतवा रा ठाण्यातील दोन कर्मचाऱ्यांनी तिच्या भावाला या प्रकरणात सक्षमचा खून करण्यासाठी प्रेरित केले होते. तू इतरांना धमकावतोस पण तुझ्या बहिणीचे बहिणीचे मॅटर असलेल्याला का संपवत नाहीस असे म्हणून खून करण्यास प्रेरित केले. त्याचवेळी खोटा गुन्हा दाखल करण्यास नकार देणाऱ्या आंचलचा मोबाईल फोडून टाकला आणि या घटनेच्या चार तासानंतरच खुनाचा हा प्रकार घडला. या सर्व प्रकरणात माही दासलवार आणि धीरज कोमुलवार दोन पोलीस कर्मचारी जबाबदार आहेत, ते दोन्ही पोलीस कर्मचारी मामीलवाड यांचे नातेवाईक आहेत, असा आरोप सक्षम ताटे कुटुंबीय आणि आंचलने केला आहे. या प्रकरणात पोलिसांकडून त्या दोन्ही कर्मचाऱ्यावर कारवाई करण्यात दिरंगाई होत असल्याचा आरोप केला आहे. सात दिवसापूर्वीच सक्षम ताटे कुटुंबीयांनी त्या कर्मचाऱ्याविरुद्ध कारवाई करावी अशी मागणी केली होती. तसेच २४ डिसेंबर रोजी आत्मदहनाचा इशाराही दिला होता; मात्र या काळात पोलिसांनी ताटे कुटुंबीयांना कोणतेही पत्र अथवा कोणतेही उत्तर दिले नाही.