नांदेडमध्ये भाजप उमेदवार संतुक हंबर्डेंच्या प्रचाराचा नारळ फोडण्यास ना अशोकरावांची उपस्थिती ना चिखलीकरांची..!

नांदेड – नांदेड लोकसभा पोटनिवडणुकीत भाजपाने डॉ. संतुक हंबर्डे आणि विधानसभेसाठी नांदेड उत्तर मतदारसंघात शिवसेना शिंदे गटाचे बालाजी कल्याणकर यांना तर नांदेड दक्षिणमध्ये शिंदे गटाचेच आनंदराव बोंढारकर यांना उमेदवारी दिली आहे. सोमवारी महायुतीच्या लोकसभा आणि विधानसभेच्या उमेदवाराच्या प्रचाराचा नारळ फोडण्यात आला. नांदेड उत्तरमध्ये मरळक येथील विमलेश्वर महादेव मंदिर आणि नांदेड दक्षिण मतदारसंघात विष्णुपुरी येथील काळेश्वर महादेव मंदिरात प्रचाराचे नारळ फोडण्यात आले. या दोन्ही कार्यक्रमास माजी मुख्यमंत्री, भाजपाचे नेते खा. अशोकराव चव्हाण यांच्यासह माजी खासदार प्रतापराव पाटील चिखलीकर यांचीही अनुपस्थिती होती. त्यामुळे लोकसभा पोटनिवडणुकीत भाजपाचा नांदेडचा गड नेमका कोण सांभाळणार आहे, याबाबतही चर्चा सुरू झाल्या आहेत.

नांदेड लोकसभेच्या सार्वत्रिक निवडणुकीत काँग्रेसचे उमेदवार वसंतराव चव्हाण यांनी जवळपास ६० हजार मतांनी चिखलीकरांचा पराभव केला होता. मात्र दुर्दैवाने त्यांचे २४ ऑगस्ट २०२४ रोजी निधन झाले. त्यामुळे नांदेड लोकसभा मतदारसंघाचे पोटनिवडणूक होत आहे. या पोटनिवडणुकीसाठी काँग्रेसने एकमताने दिवंगत वसंतराव चव्हाण यांच्या सुपुत्र डॉ. रवींद्र चव्हाण यांना उमेदवारी दिली. प्रा. रवींद्र चव्हाण यांची उमेदवारी दाखल करताना झालेल्या शक्ती प्रदर्शनाने पुन्हा एकदा महाविकास आघाडीमध्ये नांदेडच्या लोकसभा जागेबाबत आत्मविश्वास निर्माण झाला असल्याचे स्पष्ट झाले आहे. त्याचवेळी नांदेड लोकसभा मतदारसंघातील सर्व सहाच्या सहा जागेवर काँग्रेसला महाविकास आघाडीतील घटकपक्षाने उमेदवारी देऊन एक नवा इतिहास रचला आहे. त्यामुळे मतदानादरम्यान क्रॉस वोटिंगचा फटका बसणार नाही याची काळजी घेतली आहे. नांदेडमध्ये उत्तर मतदारसंघात अब्दुल सत्तार यांच्या रूपाने तब्बल ४० वर्षानंतर मुस्लिम उमेदवार विधानसभेच्या रिंगणात उतरविला आहे. नांदेडमध्ये लोकसभा सार्वत्रिक निवडणुकीत उत्तर मतदारसघात काँग्रेसच्या उमेदवाराला मिळालेले मताधिक्य पाहता विधानसभेतही याच लीडची पुनरावृत्ती होईल, असा विश्वास व्यक्त केला जात आहे. दुसरीकडे भाजपाने उमेदवारी अर्ज दाखल करण्याच्या मुदतीपूर्वी एक दिवस आधी डॉ. संतुक हंबर्डे यांना उमेदवारी दिली. दोन्ही बड्या नेत्यांच्या पसंतीच्या उमेदवारांच्या यादीमध्ये हे नाव नव्हते हेही विशेष. त्यामुळेच आता त्यांनी प्रचाराकडेही पाठ फिरवली असल्याची माहिती सूत्रांनी दिली. या सर्व पार्श्वभूमीवर भाजपाकडून सुनियोजित पद्धतीने लोकसभा पोटनिवडणुकीचा प्रचार होईल असे अपेक्षित होते. मात्र सोमवारी प्रचाराच्या नारळ फोडण्यासाठी झालेल्या सभेतील प्रमुख नेत्यांच्या अनुपस्थितीची चर्चाच मोठ्या प्रमाणात झाली.

जिल्ह्यातील दोन्ही बडे नेते आपापल्या मतदारसंघात प्रचारात गुंतले आहेत. त्यांचे समर्थक पदाधिकारी, कार्यकर्तेही त्या त्या मतदारसंघात रवाना झाले आहेत. त्यात लोहा मतदार संघ तर नांदेड लोकसभा मतदारसंघात समाविष्टही नाही. त्यामुळे प्रतापराव पाटील चिखलीकर हे जिल्ह्यात होणाऱ्या बड्या नेत्यांच्या सभा वगळता स्थानिक स्तरावर होणाऱ्या नियोजनात निश्चितच सहभागी राहतील की नाही याबाबत कार्यकर्त्यांमध्ये शंकाच आहे. तर भोकर मतदारसंघातील परिस्थिती पाहता माजी मुख्यमंत्री अशोकराव चव्हाण हेही आपल्या करण्यासाठी भोकर मतदार संघातून जास्त दिवस दूर राहू शकणार नाहीत. त्यामुळे भाजपा नेते तथा पंतप्रधान नरेंद्र मोदी यांच्यासह राज्य पातळीवरील इतर नेत्यांच्या सभावरच नांदेडमध्ये भाजपा लोकसभेच्या पोटनिवडणुकीतील उमेदवाराचे भवितव्य अवलंबून असल्याचे दिसत आहे. त्यात भाजपा उमेदवाराचे प्रचाराच्या प्रारंभीपासूनचे एकूणच ‘राग रंग’ पाहता अनेक कार्यकर्ते लांबच राहणे पसंत करीत असल्याची कुजबूज सुरू आहे.