नांदेड शहराचा पाणीप्रश्न सोडविण्यासाठी सलग सात दिवस २४ तास प्रयत्न

नांदेड – शहराचा पाणीपुरवठा ऐन उन्हाळ्यात खंडित झाल्यामुळे नांदेडकर संतप्त झाले आहेत. मात्र हा पाणीपुरवठा सुरळीत करण्यासाठी महापालिका प्रयत्न करत नाही,  महापालिकेचे नियोजन नाही असे अनेक आरोप नागरिकांतून, विविध संघटनांकडून होत आहेत. मात्र प्रत्यक्षात दोन मे रोजी पहाटे निर्माण झालेला हा पाणीप्रश्न सोडवण्यासाठी शंभरहून अधिक कर्मचारी, अधिकारी सलग सात दिवस २४ तास प्रयत्न करत असल्याचे वास्तव आहे. संपूर्ण पंप हाऊसच  कोलॅप्स झाल्यानंतर पुन्हा नव्याने उभारणी करण्यासाठी जो वेळ लागणार आहे तो निश्चितच द्यावाच लागणार लागेल.

 महाराष्ट्र दिनाच्या मध्यरात्री विष्णुपुरी प्रकल्पावरील कोटीतीर्थ येथील पंपहाऊसची पाईपलाईन बंद पडली. येथील एक जॉईंट निसटल्याने नांदेड शहराचा पाणीपुरवठा  ठप्प झाला.  कोटीतीर्थ येथील पंपगृहातून पाणी उचलून ते काबरानगर येथील दोन जलशुद्धीकरण केंद्रात घेतले जाते. ते पाणी शुद्ध करून नांदेडकरांना दिले जाते. कोटीतीर्थ येथील पंपहाऊस संपूर्णतः कोलॅप्स झाल्याचा प्रकार दोन मे च्या पहाटे घडला होता. त्यानंतर शहराला पाणीपुरवठा कसा करायचा याबाबतचे नियोजन आयुक्त डॉ. महेशकुमार डोईफोडे यांनी हाती घेतले. यासाठी पाणीपुरवठा विभागही अविरत कार्यरत आहे. पहिल्या टप्प्यात कोटीतीर्थ पंपहाऊस येथील निर्माण झालेला अडथळा दूर करण्यासाठी तब्बल तीन ते चार दिवस लागेल हे घोषित करण्यात आले. तोपर्यंत पर्यायी पाणी पुरवठा करण्यासाठी इसापूर धरणातून पाणी सोडावे अशी मागणी जिल्हाधिकारी कार्यालयाकडे करण्यात आली. पाणी प्रश्नाचे गांभीर्य लक्षात घेता जिल्हाधिकारी अभिजीत राऊत यांनीही तातडीने ईसापुर धरणातून पाणी सोडण्याचे आदेश दिले. या आदेशाची अंमलबजावणी झाली. पाणी अपेक्षेपेक्षा २४ तास उशिरा पोहोचले आणि सोमवारपासून शहरातील काही भागांना सांगवी पंपहाऊस येथून पर्यायी पाणीपुरवठा योजनेद्वारे पाणी देण्याचे काम सुरू झाले. त्याचवेळी टँकरचेही नियोजन करण्यात आले होते. मात्र शहरातील एकूण लोकसंख्या आणि टँकरचा अभाव ही बाब लक्षात घेता संपूर्ण उत्तर नांदेडला टँकरने पाणीपुरवठा करणे अशक्यच होते. यातून काही भागांना पाणीपुरवठा झाला तर काही भागांना झाला नाही. यामुळे अनेक ठिकाणी तंटेही निर्माण झाले. कोटीतीर्थ पंपगृहाचे काम करण्यासाठी कोलकत्ता, हैदराबाद आणि नाशिक येथून साहित्य आणावे लागले. हे साहित्य आणण्यासाठी लागणारा कालावधी लक्षात घेता काम होण्यास काही अंशी विलंबही झाला. तर दुसरीकडे आहे ती पाईपलाईन पूर्णतः नव्याने बदलणे हेही मोठे आव्हान होते. ते आव्हानही महापालिकेच्या पाणीपुरवठा विभागाने पेलले. महापालिका आयुक्त डॉ. महेशकुमार डोईफोडे, अतिरिक्त आयुक्त गिरीश कदम, कार्यकारी अभियंता दिलीप आरसुडे यांच्या मार्गदर्शनाखाली २४ तास हे काम सुरू होते. यासाठी उपअभियंता राजकुमार बोडखे, कनिष्ठ अभियंता जकीउल्ला खान, व्यंकटेश गोकुळे यांचीही भूमिका महत्त्वाची ठरली.

दुसरीकडे हे काम करणाऱ्या ठेकेदारानेही अत्यंत तातडीने साहित्य उपलब्ध करून आपली कार्यतत्परता दाखवून दिली. मुंबई येथील जवळपास २५ ते ३० कर्मचारी या कामासाठी आणण्यात आले होते. त्यामुळे हे काम म्हणावे तितके सोपे नव्हते. परंतु शहरवासीयांना पाणी देण्यासाठी २४ तास काम करून कार्यरत राहून ते अंतिम टप्प्यात आणण्यात यश आले आहे.