नांदेडमध्ये बर्निंग कारचा थरार..!

नांदेड – नांदेड शहरामध्ये आनंदनगर मुख्य रस्त्यावर शनिवारी सायंकाळी पावणे सात वाजेच्या सुमारास एका महिंद्रा कारने पेट घेतल्याने एकच खळबळ उडाली. ऐन वर्दळीच्या वेळेतच मुख्य रस्त्यावर आगीची ही घटना घडल्याने नागरिकांमध्ये भीती पसरली होती. घटनेची माहिती मिळताच नांदेड महापालिकेच्या अग्निशमन दलाने तातडीने ही आग आटोक्यात आणली.

सध्या नांदेडकर हे संपूर्ण कुटुंबीयांसह दिवाळीच्या खरेदीसाठी गर्दी करत आहेत. त्यामुळे शहरातील सर्वच बाजारपेठेत तसेच मुख्य रस्त्यावरही नागरिकांची गर्दी होत आहे. खरेदीसाठी वजीराबाद, श्रीनगर, आनंदनगर, वर्कशॉप, शिवाजीनगर, जुना मोंढा, सिडको, हडको तसेच इतर भागातही मोठ्या प्रमाणात गर्दी होत आहे. या वर्दळीमुळे  सध्या ठिकठिकाणी वाहतुकीची कोंडी होत आहे. दिवसभर अनेक भागात, मुख्य चौकामध्ये वाहतुकीच्या कोंडीने नागरिक त्रस्त झाले आहेत. त्यात सायंकाळी वर्दळ आणखी वाढते. आनंदनगर रस्त्यावरही वर्दळ वाढलेली असतानाच शनिवारी सायंकाळी मुख्य रस्त्यावरच आगीचा हा प्रकार घडला. त्यामुळे काही वेळ नागरिकांमध्ये भीती पसरली तसेच वाहतुकीचाही मोठ्या प्रमाणात खोळंबा झाला होता. सुदैवाने या घटनेत कुणालाही इजा झाली नाही.