नांदेड जिल्ह्यात पुन्हा एकदा पूर परिस्थिती गंभीर..!

नांदेड – नांदेड जिल्ह्यात पुन्हा एकदा पूर परिस्थिती गंभीर झाली आहे. जिल्ह्यातील बिलोली, मुखेड, कंधार, देगलूर, नायगाव, लोहा या तालुक्यात अनेक गावांमध्ये पाणी शिरले असून नांदेड – हैदराबाद, नरसी- बिलोली, मुखेड तालुक्यातील अनेक रस्ते बंद पडले आहेत. जिल्ह्यात गोदावरी, मानार, लेंडी, मांजरा या नद्यांना पूर आला असून शेती पिकांचे जिल्ह्यात मोठ्या प्रमाणात नुकसान झाले आहे. पशुधनाचीही अनेक ठिकाणी हानी झाली आहे. देगलूर तालुक्यात दीड हजाराहून अधिक नागरिकांना सुरक्षित ठिकाणी स्थलांतरित करण्यात आले आहे. जिल्ह्यातील मुखेड, नरसी, धर्माबाद या शहरांमध्येही पाणी शिरले आहे. देगलूर येथे एसडीआरएफची तुकडी तैनात करण्यात आली असून मुदखेड येथील सीआरपीएफ जवानांची बचाव कार्यासाठी मदत घेतली जात आहे.

जिल्ह्यात गेल्या २४ तासापासून पावसाची संततधार सुरूच आहे. जिल्ह्यातील बिलोली, मुखेड, कंधार, नायगाव या चार तालुक्यात १७ महसूल मंडळात अतिवृष्टीची नोंद झाली आहे. जिल्ह्यातील गोदावरी, मांजरा, लेंडी या नद्यांच्या पाणी पतळीत वाढ झाली आहे. या नद्या दुथडी भरून वाहत आहेत. नायगाव तालुक्यातील नरसी गावात अनेक घरांमध्ये पाणी शिरले आहे. देगलूर – उदगीर रस्ता बंद झाला आहे. बिलोली- नरसी रस्ताही बंद झाला आहे. गोदमगाव, परडवाडी कोलंबी कहाळापुर या नायगाव तालुक्यातील गावांमध्ये पाणी शिरले आहे. चिखली, येलूर, दहीकळंबा, सावळेश्वर, चिखली या कंधार तालुक्यातील गावामध्ये पाणी आले आहे. कापशी खुर्द, ता. लोहा या गावात पाणी आले असून उमरा गावही पाण्याखाली गेले आहे. बिलोली तालुक्यातील येसगी येथील नागरिकांना सतर्कतेच्या सूचना प्रशासनाकडून देण्यात आल्या आहेत.

गेल्या २४ तासापासून तेलंगणा राज्यात मुसळधार पाऊस सुरू आहे. पाणी पातळी नियंत्रित करण्यासाठी निजामसागर धरणातून होत असलेल्या विसर्गामुळे शेळगाव, जुने मेदनकल्लूर, सांगवी उमर, तमलुर या गावात पाणी आले आहे. प्रशासनाने या चारही गावातील सुमारे दीड हजार लोकांना सुरक्षितस्थळी हलवले आहे. सद्यस्थितीत परिस्थिती नियंत्रणात असून खबरदारीच्या उपायोजना म्हणून नांदेड येथून एसडीआरएफची तुकडी देगलूर येथे रात्रीच पाठवण्यात आली आहे. नायगाव तालुक्यात बचाव कार्यासाठी मुदखेड येथील सीआरपीएफ केंद्रातील जवानांचीही मदत घेतली जात आहे.